كأبيات

باسم اللي فات !
باسم العياط و الحفاضات
و المدرسه و الذكرايات
و المسطره و الحبر الازرق
و القصايد كلها ..
و قصيدة "ازرق"
من هنا لحد الممات
ايام ما كنت باخبي خوفي مالمدير
و السندوتش السر و الجبنه الكتير
و اني امير ..
تحضني امي في قلبها
فبتختفي كل الحاجات
و لما قمت ف يوم بابص لقيت شنب
انا قلت ما هذا العجب
اصبحت راجل محترم
هاعمل هرم من كل بصه هابصها توقع بنات
..
باسم البنات !
لما امي ماتت مالوجع
و من الالم
-مع انه كان صاحبي الجدع-
و من الندم
و الدمع و الامراض سوا
و من الدوا
و من السكات
قام ربنا شاف انها ماتت كتير و مكمله
فاداها يوماً ما لقب
ام الممات
و اعزها و سابلنا الجسم النحيل كي ندفنه
و الروح اخدها لعنده فوق
يارب امي عزيزه لكن مش عليك
ارزقها خير المُسكَنات
امي زمان ..
قالتلي ماتبدأش شئ
غير باسم رب
انا كنت عيل بس ساكن عقلي شابّ
فكرت يومها ان كلمة "رب" ديه
معانيها ياما و باختلاف
الام مثلا رب بيت
و العامود اللي مضيق الصالون
رب المبيت
و مديري اسمه -ربّ شغل-
و البنت تنفع رب حب
فعشان كده هارجع و اقول
باسم البنات !
..
باسم البنات
و الامنيات
"و المستحيلة الممكنة"
و العامله ام المستحيل
و الاصل ام الممكنات
انا قلبي بيحب العدد
و كأني كنت زمان نبي
و ف قلبي كل المعجزات
بيحب بنت
و بنت تعشق نظرتي
لكنها بتخاف تدوب جوه العينين
و بنت تحلم تبقى ما ملكت يمين
من ادرعي
و بنت شايفاني قصيده
و بنت دايبه فمطلعي
المعجزه فالقلب ده
انه بيعكس كل شئ بيحس بيه ..
فأي بنت باحبها
هاجي و اقولك انها بتحبني
و كل بنت تحبني
هاجي و اقولك اني نفسي احبها و مابحبهاش
مع اني ...
مش عارف اقول
كل البنات -من حظها- بتحبني
او اقول باحب -بوكستي- كل البنات !
...
باسم اللي مات !
مش شخص لأ
الطفل كان بينط فيا
مره كل فين و فين
دلوقتي باجي انده عليه
مابيدينيش حتى السكات
"اصبحت كهلا منقعر
لم امتلك حتى الرفات"
كل الولاد تشبه لابوها
الا انا
اشبه لامي فالممات
فانا مت مره من الالم
و مره تانيه مالسكات
من غير ما اطول حتى الندم
و من الوجع
مع انه -كان- صاحبي الجدع
 و عاصرت جمع من الصحاب و الاصدقاء
 ‏الاصدقاء كانت بتصدق وعدها
 ‏اما الصحاب
في يوم بيخلص وقتها
و كانهم اطباق دَسَم
و انا مش باجوع
عمري ما حسيت بالشبع
علشان باكمل بعده اكل و رمرمه
بعده مغص
 فكل دايرة معرفه
 ‏كل الصحاب ..
 ‏كات معرفه
 ‏و بيسرقوا صورتي و كلامي و كل ذرة معرفه
 ‏و يوزعوها عالبشر
 ‏و كانها كات ملكهم
 ‏لو قلبي كان بيعكس الاحساس معاهم
 ‏كنت هابقى ملكهم
 ‏لكنهم ..
 ‏مكانوش بنات بقدر كافي لقلبي يدن
 ‏فهما ملكي .. عادي جدا
 ‏لكني بازهد للفقير ما امتلك
 ‏ان التصدق و الزكاه
 ‏مالمنجيات
 ‏و لهذا انا باكتبلكم
 ‏يا اصدقاء
 يا كل حد بجنس واحد .. مش صحاب
 ‏باكتبلكم
 ‏باسم العياط
 ‏و الحفاضات
 ‏و الذكرايات
 ‏و قصيدة ازرق
 ‏و البنات
 ‏وام الممات
و الامنيات
قلب النبي
و المعجزات
باسم اللي مات
او كان في غمه و لسه حي
باكتبلكم باسم اللي فات ..
انا مش هاهزر فاللي جي !
..
#بسم_اللي_فات
#كابيات
بقلم محمد عبد المحسن