الموضوع :- العلاقات المؤذية( الجزء الاول)⁦✍️

بقلم :- د خالد صقر
أخصائي التشخيص والعلاج النفسي
مقدم برنامج من غير كسوف ومقدم العديد من البرامج التليفزيونية وضيف دائما بالتليفزيون المصري والقنوات الفضائية الخاصه


الموضوع :-
العلاقات المؤذية( الجزء الاول)⁦✍️

مش بس علاقة ارتباط ممكن تكون علاقة صداقة ، أي علاقة بيكون فيها طرفين او أكثر ،كل طرف بيقوم بدور،
فى العلاقة المؤذية بيكون فيها طرفين مهمين (الضحية)و (الجاني)

اسمها علاقة مؤذية لانها بتستنزف كل مشاعرنا وطاقتنا وتفكيرنا وصحتنا وتاخد من وقتنا وأيامنا ، علاقة كلها تعب وإرهاق وألم نفسي مستمر

هتلاقى فيها سخريه، ونقد لأى حاجه بتعملها ،وعدم احترام ليك ولخصوصيتك وطموحك ، هتلاقى نفسك بعدت عن صحابك وفقدت ثقتك بنفسك وبقيت نسخه من ناس تانيه ، هتلاقيك خسرت نفسك علشان ترضى الطرف التاني.

 اما تلاقى كل دا اعرف انك فى علاقة مؤذية

العلاقات بين البشر ربنا سبحانه وتعالى خلقها قائمه على التبادل اللى مليان مودة ورحمه ، كلمه تبادل دى اللى هتخلينا نفرق بين مصطلح العلاقات المؤذية اللى اتكلمنا عنه ومصطلح العلاقات الغير مشبعه القائمه على سد احتياجات فقط.

أنا عارف انك بتكون فى حيرة مابين عقلك اللى بيقولك امشى وقلبك اللى بيقولك مش هقدر استغنى بس لو لقيت نفسك فى علاقة زى دى الأفضل تمشى وتنسحب ، امشى قبل ما عينك وعقلك يبدأوا يتشبعوا بصفات الناس دى
وجع ساعه ولا كل ساعه .

لذلك بننصح الدخول فى( فترة التعافى) من العلاقة دى:
⁦⏺️⁩اننا اولا نستعين برب العالمين

⁦⏺️⁩ثم نلجأ لمختص يساعدنا ، يساعدنا اننا منكونش فريسه ولا ضحيه لعلاقه من النوع دا ، يساعدنا نبطل ندى مبررات وندى فرص لناس بتستغلنا ، يساعدنا نكون علاقات سليمه ، يساعدنا نحط حدود لعلاقتنا ، يساعدنا نبعد عن تمسكنا بدور الضحيه علشان نعيش دور البطوله لحياتنا

انت تستاهل تكون فى علاقة جميله بها تبادل بها مودة ورحمة ، تستاهل تحس انك متقدر وفارق ، تستاهل تحس انك موجود تستاهل تبقى نفسك تستاهل تحس بقيمتك.

ربنا يوهبكم علاقات سليمه صحيه ويرزقكم بيها

انتظروا ( الجزء الثاني ) اللى هتكلم فيه عن فترة التعافى وازاى نتخلص من العلاقات المؤذية .