دفتر الماضي

بقلم نور الخضري

في ليله من ليالى الصيف 

ونسمه هاديه هواها خفيف 

مع موجه بحر بشكل ظريف 

عماله بتجيب وتودى 

ومع ضحكه حلم زمان كان

 في سماه باللون الوردى 

فجاءة خدنى خيالي لبعيد

لولد وبنت بالتحديد

كان حاضن ايديها بحب 

وملامحه تقول انه سعيد

كانت بصاله بابتسامه

وعيونها في حبه هيمانه 

كانت الليله جميله جدا 

اصلها فى ليالى العيد 

وعيونهم فيها حكاوى ياما

وفي وعوده عمال بيعيد 

 قدملها ورده هديه

علي كام كلمه حب وملاغيه 

ضحكه م الفرحه زى الاطفال 

حست بسعاده وعاشت في خيال 

وموجه ورا موجه معديه 

وفجاءة جريوا مع الموج 

في سعاده وصفاء نيه 

وكأن الحب دا زى الجنه 

فيه القلب بيعيش يتمنى 

ونظن ان الحلم في ثانيه 

هنفتح نلقاه بقي واقع 

وبرغم ان الليله كانت صيف 

لكن فجاءة الجو اصبح ساقع 

شغلها اغنيه وبابتسامه حب هاديه 

قالها اتمني امنيه 

قالت نفضل علي طول مع بعض 

ولا يوم نختار البعد 

قالو لو يوم نتفارق 

مش هنكون غير بردوا لبعض 

ابِتَسمت علي كلامهم

والحلم الساكن في خيالهم 

وازاى الحب كدا يقدر 

بسهوله يحلى ايامهم 

وفجاءة الموج عمال بيزيد

ولكن القلب في حبه عنيد

وبكسرة بصيت لبعيد

مهو اصل الواقع مش دايما 

بتكمل فيه قصص الحب 

وزى ما بنقول اهلا 

بسهوله جدا بنودع بعض

ومع الايام نتفارق 

ومابينا ماعاد شئ فارق 

ونعيش بالحزن مع الاحلام 

اللى بغدر قتلها الواقع 

وازاى في ليالى الصيف 

الجو يكون فعلا ساقع 

مش دايما الحب بيسعد 

ولا دايما نهاياته تتحب

وسرحت في كام ذكري غريبه 

مع حبه شوق علي تنهيده

على كام حلم زمان عشانهم

على حبه حواديت قولناهم

علي بحر وشط وسما صافيه 

على نظرة عين كانت دافيه

علي كام قصه اتمنينا نعيشها 

لكن فى الواقع كانت اوهام

وازاى الحلم اللى بدايته بحبك

تبقي نهايه بسهوله سلام

زمان كنت اتمنى الحب 

تكون نهاياته سعيدة 

لكن بالتجربه القلب

بيتمنى بدايه جديده

او انه يعيش في الواقع 

يمكن يقدر ينسي الاحلام 

واهو كله بيصبح ذكري 

والذكرى كفيله بيها الايام 

كانت فرحانه انها جمبه 

ولاول مرة حست حبه 

لمس ايديها بحب وقال 

بتحبينى...! 

اتفاجئت جدا م السؤال 

بصلها وقال جاوبينى 

قالت طبعا اومال ايه 

بتسمى اللى بينا دا ايه 

وفجاءة جت موسيقي هاديه

لكن الحانها مطمنش 

كانت الغنوه حزينه شويه 

لكن الضحكه ماليه الوش 

وفجاءة البحر جن جنونه 

ونظرات الغدر بانت في عيونه 

ضحكوا ساعتها زى المجانين 

وكان العمر رجع بيهم فجاءة لسنين 

قالت هنكمل قصتنا 

وبفخر هنحكى حكايتنا 

ونقول عشنا زمان ياما 

ليالى فعلا متتنسيش 

قال من غيرك مقدرش اعيش 

لمست ايديه وقالت 

اوعدنى انك متسبنيش 

بص في عيونها وقال 

حبك عايش جوايا 

ومفيش غيرك في سمايا 

والثانيه في بعدك ماتعديش 

اوعدك ان هكون دايما جمبك 

وفي قربك بتمنى اعيش 

وفجاءة الموج زاد 

وجريوا معاه في سعاده 

واتارى الموج غدار 

وفجاءة الحب وكالعاده 

بقي وهم متزين بسراب 

وشويه شويه الحب غاب 

وزى ما كانو في يوم احباب 

رجعهم الزمن من تانى

 عن بعضهم اغراب 

وانتهت القصه بدون داعى 

لا القلب عارف السبب 

ولا العقل اصبح واعى 

والموجه رجعت هاديه

ولحن الغنوه اصبح بارد 

وكأن القصه زمان كانت 

مجرد خيال في خيال 

هى دي كانت حكايتنا 

اللى بفرحه زمان عشناها

وادى النهايه اللى زمان كدبناها

وفجاءة مريت قدامى 

ايدك في ايد اللى حبيتها 

بسهوله نسيت ايامى 

وكأن مصدقت لقيتها 

ومشيت معاها في نفس المكان 

اللى فيه مشينا زمان 

مرت السنين واتغيرنا 

ومعانا ماتت حكايتنا 

وكملنا القصه مع ناس غريبه 

وحكايه حب ما كانت في البال

كان الحب ما بينا كان 

مجرد شئ من الخيال 

وفجاءة سمعت صوت بينادى

حبيبتى سرحانه في ايه 

ابدا يا حبيبي ما دا العادى 

مفيش شئ تشغل بالك بيه 

بص وقال طب عينى في عينك

ضحكت وقلت وهكدب ليه 

انا بس افتكرت حكايه 

سالنى وقال حكايه ايه ..!

حكايه حلم زمان عشته 

وكلام من وهم انا صدقته 

وحكايه واقع فوقنى 

وحكايه حب حقيقي بدئته

ضحك وبسرعه قال 

احنا بقينا نقول اشعار 

قولت الحياة بتعلم 

ومفيش ابدا فيها محال 

بص في عينى وقالى بحبك

قولت بفرحه وايه تانى 

قالى مفيش منك فايده

وانا هفضل وياكى بعانى 

قولت بضحك وبعدين 

قالى انا ياما حلمت بيكى 

واتمنيت تجمعنا الايام 

بصيتله بابتسامه وقلت 

فعلا غريب الواقع 

والاغرب منه الاحلام

سالنى وقال بتحبينى

قولت بحبك ودى فيها كلام 

مشينا نكمل حكاوينا 

وقلوبنا تعيد في الذكريات 

كان لينا اكيد زمان ماضي 

لكنه مع المستقبل مات