حكاوي الحياة

بقلم نور الخضري

قالو عليك دايما ساكت
وف عينك كام غنوه حزينه
نظراتك في عيونهم تاهت
مليانه دموع علي حيرة
اسئله جواك مالهاش اجابات
والرحله سكتها غريبه
يمكن ندمان يمكن زعلان
او يمكن عايش والسلام
احكام الناس مش دايما صح
اوقات بيكون في القلب كلام
ولا ميت مليون حرف يوضحه
بسذاجه بتتمنى حبيب
في الطيبه يشبه لملاك
حلمك مش دايما كامل !
والبطله مش دايما حباك
نظرة عنيك مليانه حكاوى
وكام قصه وشويه غناوى
وفلان زمان كان حب فلانه
ودا ساب حبيبته عشان خاين
ودى باعت حبه لان جبانه
والقصه الحلوة الورديه
نهايتها حزينه ومخزيه 
قالو عايش مرتاح من غيرها
قالو قفلت للحب دفاترها
حقيقي الحب دا مالوش امان
كانو اخوات و صحاب زمان
كان بينهم ضحك وكام ذكري
علي كام حلم جميل لبكرا
القصه كانت يمكن حلوه
لكن بالحب مكملتش
اعزفلك ع اللحن بغنوه
كلماتها جميله لكن متسمعتش
كمل فى طريقه وقال ..
هى اللى راحت ولا رجعتش
كملت مع حب جديد
ولقلبها تانى مسمعتش
ونهايه القصه الورديه ...
كان كل واحد فى طريقه
لا القلب بقا عارف يحب
ولا حتي بيستني حبيبه
شوفت ازاى الحب دا وهم
وان مسار القصه اتحول
كان يمكن لو نعرف دا
مكناش نبداء م الاول !
وسرحت هناك في شله صحاب
متجمعين في قهوه زمان
نفس الضحك والانسجام
والضؤ الهادي والشارع الزحام
لكن الضحك مع ناس تانيه
اصل الوضع اختلف كتير
بعدتنا الدنيا بعمايلاها
وواحدة واحدة ظهر التقصير
يمكن بعدنا كتير لكن
مازلت فاكرهم بالخير
كان لينا هنا ياما حكاوي
وياما ضحكنا مع بعض زمان
وكتبنا ف ورقنا امانى
وف خيالنا اتولدت احلام
وبسرعه خلصنا الجامعه
كنا لسه في سنه اولى
فينا اللى بيحلم بالتقدير
وفينا اللى بيحلم ببطوله
احلامنا كانت متفاوته كتير
لكن ع الصحبه اتجمعنا
سنه ورا سنه حصل التغير
ومبقاش فيه شئ يجمعنا
وادينا اتخرجنا خلاص ..
بالحب نودع بعضينا
اهى قصه خلصت وخلاص
وبكل ما فيها مرينا
ومازال الحب بيجمعنا
ومازالت باقيه حكاوينا .