كأبيات

اكتب لمين
ان الهوى عذبني بالاكراه؟
كل اللي حبوا مايعرفوش الحب!
اكتب لمين الحب جي للناس
بس انت حبك تاه؟
..
اكتب لمين انك معاه؟
انك هواه..
و الدنيا و ما فيها

اكتب لمين انك يجوز في مقابله هتحبيه؟
 و انا مش هاكون فيها!
اكتب لمين؟
 الناس مابتصدقش غير صدق اللسان
 و انا قلبي دايما فيه كلام
 بس اللسان عطلان عشان
 متعود ان النعمة يوم هتزول
 متعود ان النعمة.. اداريها

اكتب لمين؟!
الكلمه نعمة مامدهاش غير للي هيقدر
و انا عمري ما اتقدرت في كلامي

انا ليه حزين انك هتنسيني؟
مانا برضه بانسى..
اني ليا وجود ساعات
و بالم نفسي من القهاوي لبعضها
و بالم نفسي لناس ماتتلمش
و بحط نفسي في ركن متهمش
و باسمي نفسي في وسطهم واحد
و انا ترتيبي عمره ما كان في يوم واحد

برغم اني بحب الوحدة وسط الناس
عمري ما كنت يوم وحدي
و رغم اني بحبك قد كل الناس
عمري ما كنت اقول و احكي
..
انا.. ناكر حقوقي كاني باكرهها
و الناس تشوفها زهد.. حريه
انا.. بانكر حبيبتي و احاول انساها
و الناس تشوفني تحبها فيا
..
خايف
شفايف دنيتي تلزق
 في بوسة مطوله حبه
و الدنيا ماتحبش.. سوى الداني
الدنيا ام لكل احزاني
و الخوف بيسرق كل حاجه بحبها من قبل ما باعيشها
فمابعيشهاش
عرفت ان الدنيا ديه قرارات
لكني خفت اقول بطلت اخاف تاني..
..
اكتب لمين طيب..
 ان انتي واحشاني؟

#كابيات
بقلم محمد عبد المحسن