#خواطر_أم_لملاك
أسد وغندفر ......
#بقلمى_سمية_الشرنوبى
ماهو أنا مايخيلش عليه كلام
إن الرجالة صح تمام
بقى بتتسرمح برة البيت
وأسد وغندفر مع المدام
السبحة فى إيدك بتسبح
وبره بتغازل وتقبح
لا زميلتك سلمت من شرك
حتى مع مديرتك بتبجح
وساعة الفاس ماتقع في الراس
تقف قصادها لايص محتاس
ياحبيبتي ده انتى الى فقلبى
والباقي مسحته من الكراس
وتصدق ماهى ست الدنيا
عايزة تعيش وملايماها
والدنيا حواليها لايماها
عشان عينك مش شايفاها
يقولولها أصلك معيوبه
سيبتيه ليه لواحده أروبة
لبس وزواق آخر حركات
اما انتى بقيتى عرقوبه
تصرخ وتقول أنا حملي تقيل
بين شغلى وبيتى مطحونة
وحبيبى عويل
لافيوم فكر لابنه يذاكر
والبنت دَلَعها ع الاخر
سايب لى اللوصة أنا الوصها.
ويخرج يرجعلى آخر الليل
ويأكد إنه سي السيد
بكم شخطةوكم قيدبيقيد
على إيه ياغندفر متسيد
خلاص انا ماشيه بلاش تعقيد
وتمشي وكأنه خد إفراج
يعمل مابداله بدون إحراج
مايقولش فيوم البيت محتاج
سته تنورله البيت والكون
مااصله بالستات مجنون
وفاكرها ع الرف مكانها
يرجع لها بعد مايخون
لكن هيهات دى خلاص إرفت
من أفعالك وخلاص عرفت
إن انت مش انسان مسئول
وقالت مش راجعه
خلاص خلصت
وفى عز وجعك فى غيبتها
بتكابر وتقول مشيتها
خلاص مابقيتش لازمانى
تنسى انها ترجع بيتها
ماتماين حبة ياسى السيد
وتحس بقيدها الى مقيد
مشاعرها إلى انت واجعها
وعليها بتأمر تتسيد
ده يمينك ربنا قال إنه
بيهز العرش إكمنه
بيهد البيت على أصحابه
يخرَب وتعيش ياحزين محزون
وبحبة عِند الدار خربت
والست خلاص
أهى نسيت
أيامك ووعودك ليها
ولاشافت وعد لها اتوفى
فى ايه ؟ مستنيها تتوفى؟
من باب اولى تكون الاوفى
وتعيش حبها طول الأيام
ماهو أنا مايخيلش عليه كلام
إن الرجالة صح تمام...
٢٠٢٢/١٢/٢١
Reviewed by من هنا و هناك
on
ديسمبر 22, 2022
Rating:
ليست هناك تعليقات: